विमानतळावर तरुणींकडून तरुणाला दे दणादण, कपडे फाडले, व्हिडिओ पाहून अनेकांचा संताप

रायपूर: सोशल मीडियावर एकापेक्षा एक व्हिडिओ व्हायरल होत असतात. अनेक व्हिडिओ पाहिल्यानंतर आपण खळखळून हसतो, तर काही व्हिडिओ पाहून संताप होतो. सध्या सोशल मीडियावर एक व्हिडिओ व्हायरल होत आहे जो पाहिल्यानंतर तुम्हाला धक्काच बसेल. सोशल मीडियावर व्हायरल होत असलेल्या या व्हिडिओमध्ये अनेक तरुणी मिळून एका पुरुषाला जबर मारहाण करत असल्याचं पाहायला मिळत आहे. एवढंच नाही तर मारहाण करताना त्यांनी त्या पुरुषाचे कपडेही फाडले. हे संपूर्ण प्रकरण रायपूरच्या विमानतळाचे असून सध्या चर्चेचा विषय बनले आहे.

मिळालेल्या माहितीनुसार, रायपूर विमानतळाबाहेर एका ट्रॅव्हल एजन्सीमध्ये काम करणाऱ्या काही तरुणींनी एका तरुणाला बेदम मारहाण केली. हा तरुण यापूर्वीही येथे काम करायचा आणि काही कामानिमित्त तेथे आल्याचं सांगितले जात आहे. मॅनेजरचा नंबर विचारल्यावर तिथे उपस्थित तरुणींशी त्याचा वाद झाला आणि या तरुणींनी त्याला मारहाण करण्यास सुरुवात केली. याप्रकरणी दोन्ही पक्षांनी पोलिसांत तक्रार दाखल केली आहे.

पाहा व्हिडिओ –

हेही वाचा –फक्त १०-१२ बॉल्स खेळविण्यासाठी या खेळाडूला संघात घेऊ नका, गौतम गंभीर स्पष्टच बोलला

दिनेश असे त्या व्यक्तीचे नाव आहे. तो एका ट्रॅव्हल एजन्सीत कामाला होता. कंपनीच्या व्यवस्थापकाचा नंबर मागण्यासाठी तो गेला होता. यावरून त्याच्यात आणि ट्रॅव्हल एजन्सीमध्ये काम करणाऱ्या काही तरुणींमध्ये वाद झाला. त्यानंतर विमानतळावर या तरुणींनी दिनेशला मारहाण केली.

ही घटना घडत असताना विमानतळावर उपस्थित काही लोकांनी या प्रकरणाचा व्हिडिओ बनवला आणि आता हा व्हिडिओ सोशल मीडियावर प्रचंड व्हायरल होत आहे. या तरुणाला कपडे फाटेपर्यंत बेदम मारहाण केल्याचे व्हिडिओत स्पष्ट दिसत आहे. एक तरुणीतर ऑटो चालकाला बेल्टने मारहाण करत असल्याचंही दिसत आहे. तर यादरम्यान शिवीगाळही सुरू आहे.

हा व्हिडिओ पाहून नेटकऱ्यांनी यावर संताप व्यक्त केला आहे. तसेच, अशा पद्धतीने कुणाला मारहाण करणे चुकीचं असल्याचं मत अनेकांनी व्यक्त केलं आहे. त्याशिवाय, याप्रकरणी रायपूर पोलिसांनी तरुणींवर कारवाई करावी अशी मागणीही जोर धरु लागली आहे.

हेही वाचा –मोहाली MMS प्रकरण: होय, तिने व्हिडिओ बनवले; आरोपी तरुणीच्या वकिलाचा मोठा खुलासा