रिद्धपूरच्या मराठी भाषा विद्यापीठासह महानुभाव तीर्थक्षेत्रांच्या विकासासाठी मुख्यमंत्र्यांची भेट!
अखिल भारतीय महानुभाव परिषदेच्या शिष्टमंडळाची मुख्यमंत्री देवेंद्र फडणवीस यांच्याशी सदिच्छा भेट; विविध मागण्यांचे निवेदन सादर
MB NEWS (मुंबई ब्युरो): मराठी भाषा विद्यापीठ, रिद्धपूर तसेच महाराष्ट्रातील महानुभाव पंथाशी संबंधित महत्त्वाच्या तीर्थक्षेत्रांच्या विकासाला गती मिळावी, यासाठी अखिल भारतीय महानुभाव परिषदेच्या वतीने पुढाकार घेण्यात आला आहे. याच अनुषंगाने ९ सप्टेंबर रोजी मुंबईतील सह्याद्री अतिथीगृह येथे मुख्यमंत्री देवेंद्र फडणवीस यांची सदिच्छा भेट घेऊन विविध महत्त्वपूर्ण विषयांवर सविस्तर चर्चा करण्यात आली.
अखिल भारतीय महानुभाव परिषदेचे अध्यक्ष गुरूवर्य श्री. कारंजेकर बाबाजी यांच्या उपस्थितीत झालेल्या या भेटीत रिद्धपूर येथील मराठी भाषा विद्यापीठाच्या विकासासह महाराष्ट्रातील महानुभाव पंथातील विविध तीर्थक्षेत्रांच्या विकासासंदर्भातील मागण्या मुख्यमंत्र्यांसमोर मांडण्यात आल्या. यावेळी संबंधित मागण्यांचे निवेदनही सादर करण्यात आले.
रिद्धपूरला मराठी भाषा, साहित्य आणि महानुभाव परंपरेच्या दृष्टीने विशेष महत्त्व असून, या ठिकाणी उभारण्यात येणाऱ्या मराठी भाषा विद्यापीठामुळे या ऐतिहासिक भूमीला नवी ओळख मिळण्याची अपेक्षा आहे. तसेच महानुभाव पंथाशी निगडित विविध तीर्थक्षेत्रांच्या विकासामुळे धार्मिक, ऐतिहासिक आणि सांस्कृतिक पर्यटनालाही चालना मिळू शकते.
यावेळी मांडण्यात आलेल्या विविध विषयांची मुख्यमंत्री देवेंद्र फडणवीस यांनी सकारात्मकपणे दखल घेत संबंधित प्रश्न समजून घेत सहकार्य करण्याचे आश्वासन दिले. त्यामुळे महानुभाव पंथाच्या अनुयायांमध्ये तसेच रिद्धपूरच्या विकासासाठी प्रयत्नशील असलेल्या नागरिकांमध्ये आशावादी वातावरण निर्माण झाले आहे.
या महत्त्वपूर्ण भेटीप्रसंगी प.से. श्री. प्रकाश नन्नावरे आणि प.से. चेतन नलावडे यांची उपस्थिती होती. रिद्धपूरसह महानुभाव पंथाच्या ऐतिहासिक व धार्मिक स्थळांच्या विकासासाठी झालेली ही भेट आगामी काळात महत्त्वपूर्ण ठरण्याची शक्यता व्यक्त केली जात आहे.
