रिलायन्स फाऊंडेशन व पशुसंवर्धन विभागामार्फत जनावरांचे लसीकरण शिबीर आयोजित
सध्या हिवाळा सुरू आहे आणि थंडी वाढत असल्यामुळे जनावरांमध्ये आरोग्य संदर्भात विविध समस्या उद्भवतात. त्यामध्ये फऱ्या खुरकूत यासाठी जनावरांमध्ये लसीकरण करणे गरजेचे असते. वेळेवर लसीकरण न झाल्यास जनावरे दगावण्याची शक्यता असते. त्यामुळे पशुपालकांनी आपल्या पशूंची काळजी घेणे गरजेचे असते. त्यामुळे पशुसंवर्धन विभाग व रिलायन्स फाउंडेशन यांच्या संयुक्त विद्यमाने नागपूर जिल्ह्यातील सावनेर या तालुक्यातील जलालखेडा या गावांमध्ये जनावरांचे लसीकरण शिबिर आयोजित करण्यात आले. शिबिरामध्ये आजारी असलेल्या जनावरांवर उपचार करण्यात आले तसेच 150 हुन अधिक जनावरांना जंतनाशक लस, लाळ्या, खुरकूत, फऱ्या इत्यादींचे लसीकरण करण्यात आले. लसीकरण शिबिरामध्ये गावातील 40 ते 50 पशुपालकांनी आपली जनावरें उपचारासाठी आणली होती, ज्यामध्ये शेळ्या, गाई, बैल व म्हैस इत्यादी जनावरे होते. डॉ. सुनील बागडे पशु पर्यवेक्षक यांनी जनावरांवर उपचार करून लसीकरण केले. तसेच हिवाळ्यामध्ये आपल्या जनावरांची काळजी कशाप्रकारे घ्यायला पाहिजे, त्यांना चारा कुठल्या प्रमाणे द्यावा तसेच गोठ्याचे व्यवस्थापन कशा प्रकारे करावे, थंडी बसून त्यांचे संरक्षण कशा प्रकारे करावे यासंदर्भात संपूर्ण मार्गदर्शन डॉ सुनील बागडे यांनी केले. दुभत्या जनावरांना कशाप्रकारे खुराक द्यायला पाहिजे याविषयी सुद्धा त्यांनी सांगितले. कार्यक्रमाचे आयोजन रिलायन्स फाउंडेशनचे जिल्हा व्यवस्थापक मनोज काळे यांनी केले तर कार्यक्रमाच्या यशस्वीतेसाठी कार्यक्रम सहाय्यक भूषण भक्ते यांनी परिश्रम घेतले.
