येथे संजीवन समाधी सोहळा..उद्या दहिहांडी व शोभायात्राने दूमदूमणार, घुईखेड नगरी मध्ये भक्तांचा जनसागर उसळणार
MB-NEWS (चांदूर रेल्वे):– चांदूर रेल्वे तालुक्यातील घुईखेड येथे श्री संत बेंडोजी बाबा संजीवन समाधी सोहळा २२ ते २९ जानेवारीपर्यंत सुरू आहे. याच दरम्यान कथा वाचन सुरू असुन आज २८ जानेवारीला रामकथा समाप्ती होणार आहे. या संजीवन समाधी सोहळ्यात आरतीचा मान तळेगाव दशासर पोलीस ठाण्याचे ठाणेदार हेमंत चौधरी, एसआय शर्मा व कर्मचारी तसेच अन्नदाते अथर्व मेघे, पवन बंड (नागपुर) यांना देण्यात आला होता. उद्या रविवारी दहिहांडी व शोभायात्राने घुईखेड नगरी दुमदुमणार आहे. यानंतर यात्रा महोत्सवाला प्रारंभ होणार आहे.
संपूर्ण महाराष्ट्रासह इतर राज्यातील हजारो भाविकांचे श्रध्दास्थान आणि विदर्भातील एकमेव संजिवन समाधी असलेले श्री संत बेंडोजी महाराज यांनी संजिवन समाधी घेतली होती. यानंतर ६८६ वर्षांपासून समाधी सोहळा सुरू आहे. या सोहळ्याला भव्य स्वरूप प्राप्त झाले आहे. महोत्सव निमित्त उद्या रविवारी भव्य यात्रा भरणार असून या बेंडोजी महाराजाच्या संजिवन समाधीच्या दर्शनासाठी राज्यभरातून लाखोंचा जनसागर लोटणार आहे.
आठ दिवस वेगवेगळे किर्तनकारांचे किर्तन व खंजरी भजन झाले. शेवटच्या दिवशी उद्या २९ जानेवारी रविवारी दुपारी १ वाजता नांदगाव खंडेश्वर येथील ह.भ.प. उमेश महाराज जाधव (आळंदीकर) यांचे काल्याचे किर्तन होऊन सायंकाळी ४ वाजता गोपालकाला, दहिहांडी होईल. तसेच सायंकाळी ६ वाजता महाआरती झाल्यानंतर सायंकाळी ७ वाजता महाप्रसादाचे आयोजन करण्यात आले आहे. यादरम्यान बेंडोजी महाराजांची भव्य शोभायात्रा निघणार असून यात राज्यभरातील मोठ्या संख्येने आलेल्या दिंड्या सामिल होतील. हा अद्भुत सोहळा पाहण्यासाठी भाविकांची अलोट गर्दी लोटणार आहे. त्यासाठी पोलिसांचा तगडा बंदोबस्त राहणार आहे. रविवारपासून यात्रा महोत्सवाला देखील प्रारंभ होणार आहे. तरी या सर्व कार्यक्रमांचा लाभ भाविक भक्तांनी घेण्याचे आवाहन संस्थानचे अध्यक्ष वसंतराव घुईखेडकर, विश्वस्त बाळासाहेब देशमुख, प्रविण घुईखेडकर, राजाभाऊ चौधरी व इतरांनी केले आहे.
