कराड तालुक्यातील शेवाळवाडी या ठिकाणी अज्ञात वाहनाच्या धडकेत बिबट्या ठार
MB NEWS (संजय पाटील ) :कराड तालुक्यातील शेवटचे गांव शेवाळवाडी या ठिकाणी कराड चांदोली महामार्गावर अज्ञात वाहनाच्या धडकेत एक बिबट्या ठार झालेला आहे.
आज सायंकाळी सात वाजता ही घटना घडली शेवाळवाडी हे ठिकाण कराड तालुक्यातील कराड दक्षिण विभागात येत असून या ठिकाणी वनीकरणाने संपूर्ण डोंगर पठारावर अतिशय नियोजित पद्धतीने झाडांचे जतन केलेले असून या ठिकाणी मोठे जंगल असून वन्य प्राण्यांचा नेहमी वावर असतो .सर्वत्र बागायती क्षेत्र असल्यामुळे या गावात सध्या कारखान्याच्या ऊस तोडी चालू असल्यामुळे मोठ्या प्रमाणात उसाचे क्षेत्र मोकळे होत असल्यामुळे अनेक बिबटे, कोल्हे, लांडगे, तरस वारंवार शेतकऱ्यांना नजरेस पडत असतात. शेतकऱ्यांच्या जनावरांवर मोठ्या प्रमाणात बिबट्याने हल्ले करून अनेक जनावरे ठार केलेली आहेत. यामुळे या ठिकाणी नेहमी बिबट्यांचा वावर असतो आज सायंकाळी सात वाजता अज्ञात वाहनाच्या धडकेत बिबट्या जखमी होऊन थोड्या वेळातच गतप्राण झाला. या ठिकाणी वनीकरण विभागाचे अधिकारी आल्यानंतर पंचनामा करून शासनाच्या नियमानुसार पुढील सोपस्कार पार पाडले जातील.
